اقتراح مواطنه مش وش نعمه
د. سمر امين الخرباش
د. سمر امين الخرباش

الحقيقة بعد ان شاهدت امس تصريحات الشيخ صادق الاحمر في المؤتمر القبلي اللي اقر فيه تعريف واسس المدنيه والوطنية الجامعه والتصدي لعملاء ايران (رغم انه قبل ايام اتكلم عن المبالغ اللي يستلمها من السعوديه) .. ماعلينا المهم ان الشيخ صادق طالب بدوله مدنيه تكفل المساواه للجميع (ماعدا الشيوخ وابنائهم) وتكون خاليه من اي عنف او سلاح (طبعا انتم فاهمين غلط كل اسلحه اللي كانوا موجودين عباره عن اكسسسوار وشوية ار بي جي وشوية صورايخ هذه خاصه للاحتفالات لمن يكون الشيوخ في العصيمات يشتوا يرحبوا بحد او يهنوا حد) ..

طبعا احنا عارفين ان شوية بانلاقي الحوثي عمل مؤتمر قبلي ثاني ضد عملاء السعوديه ويتبنى فيه الدوله المدنيه التي يتساوى فيها الجميع (عدا آل البيت اللي هم الاحق باي منصب) و تكون خاليه من اي عنف او سلاح باتقولا عنده سلاح !!؟؟ (ابسليوووووتلي انتم غلط هي شوية دبابات بسبب وعوره الطريق في صعده يستخدموها للتنقل و الصورايخ لمن يشتوا يحتفلوا بحد بسبب بعد المسافة يستخدموها ) ..

ياليت اللي كتبوا عن الدوله المدنية والمواطنه المتساويه ونزع الاسلحه اتعرفوا على الشيخ صادق وعلى الحوثي كانوا يانتعلموا الكثير واكيد كانت اتغيرت مستوى كتاباتهم عن هذين المفهومين الله يخليهم ذخرا لليمن ..

وبناء على ما سبق نقترح احنا مواطنيين درجه عاشره الجهله المتخلفين اللي ساكنيين بباقي الجمهوريه عليكم يااصحاب النسب الرفيع والمكانه العاليه انشاء نظام فدرالي تكون فيه -صنعاء وصعده بما يشمل عمران وسنحان وخولان- فدراليه واحده علشان نخلصكم من تخلفنا وجهلنا وعدم فهمنا للمواطنه المتساويه .. الافضل ان نخلصكم من عبئنا لاننا حاسين اننا تعبناكم كثير وخصوصا اسره صالح واسره الاحمر (فأنتم هرمتم وانتم تحافضوا على اراضي ونفط الجنوبيين من الجنوبيين, واراضي ومزارع تهامه من الشيوخ والمتنفذين وحمايه تجار المناطق الوسطى من المتنفذين المستغلين و حمايه المسثمرين الاجانب من المبتزين لهم باسم الحمايه) ولانا مقدرين تعبكم واللي تخسروه علشان تقوموا لهذه المهام اللي هي حمل عليكم وبدون اي فائده ترجع لكم..

نقترح انه تبقوا انتم في فدراليتكم تنفعوها طالما اننا شعب جاهل ومتخلف ومش مقدر اللي تعملوه وتسيبونا احنا في باقي اليمن نقتل يعض او ندمر بعض الى ان نتعلم كيف "نعيش معا كأخوه او نموت معا كأغبياء" هذا احنا مش انتم طبعا .. ولاننا ناكرين جميل وماقدرنا دور الفرقة والحرس الجمهوري في حمايتنا طول هذة السنيين رائيي برضة تاخذوهم لينعموا بالسلام في فدراليتكم و تسحبوا جميع الالويه التابعه لهم من كل اليمن اصلا احنا ناس ما نستحقش النعمه اللي بفضلكم وصلنا لها ,,

ملحوظه : لو شايفيين الدكتور ياسين سعيد نعمان بايعمل لكم مشاكل او بايحاول يغتال ناس منكم هاتوه لعندنا علشان تنعموا بأمن وراحه بال ..

والله الموفق والمستعان .. وياليت تفهمونا غلط ..


في الإثنين 08 أكتوبر-تشرين الأول 2012 10:52:24 م

تجد هذا المقال في مأرب برس | موقع الأخبار الأول
https://marebpress.org
عنوان الرابط لهذا المقال هو:
https://marebpress.org/articles.php?id=17617