البارحه جريت بالصـوت سجَّـات

من ضيقتي سجيت بعض المواويل

لا وا حسافه يا زمـان الحسافـات

ليـام غبـراء والليالـي غرابيـل

يا موخذٍ (ن) عنَّي النظر انت بالذات

من علمك طعن الرهاف المصاقيـل

بنيت لك فـوق السويـدا مطـارات

حطيت لك في داخل القلب اساطيـل

هذا الزمن كان الزمن فات ما فـات

والعالـم الله مـا يقـع بالمقابيـل

يابو رغد لا جات ون كان ما جـات

دمع المحاجر ما معي لـه مناديـل

يا من تسوقون الجُمـل والعبـارات

يامن عن اخبار الحبايب مشاغيـل

حنَّا بني الحارث رجـال المهمـات

حنَّا الرجال مطوعيـن الرجاجيـل

اهل العوايـد والكـرم والمـروُّات

ما نستمع لمـروج القـال والقيـل

حنَّـا بميـدان الحرايـب قيـادات

حنَّـا سـلالات القـروم الحلاحيـل

حنَّا رجاجيل الوغـى والبطـولات

حنَّـا بظلمـات الليالـي قنـاديـل

حنَّا صناديـد الحـروب الطويـلات

ولا نحسَّب كـم خسرنـا مقاتيـل

حنَّا لنا في ساحة الحرب صـولات

نشرب من احواض المنايا فناجيـل

حنَّا الركايب عند حَمـل الثقيـلات

متى اقبلت سود الليالي المحاميـل

يشهد لنا التاريخ في كـل لوقـات

هاك الثرياء ونشد الجدي وسهيـل